သာသနာအသစ် နှင့် အဓမ္မ၀ါဒများ
((( သာသနာအသစ်နှင့် အဓမ္မဝါဒများ )))
" ကိုယ်တော်! ဘာလုပ်နေတာတုန်း"
" ထိုင်နေတာဗျ "
" သူများလှူတာစားပြီး ဘာအလုပ်မှ မလုပ်ဘဲ ထိုင်နေတာလား၊ အဲ့ဒါ ပါရာဇိကကျတယ်ဗျ၊ ဖြစ်ပါဘူး၊ သာသနာတော် သန့်ရှင်းရေးလုပ်ဦးမှပါ "
" အဲ---"
=========================
" ဦးဇင်း! ဘယ်ကြွမလို့တုန်း"
" ဒီလိုပါပဲဗျာ! အညောင်းပြေ လမ်းလျှောက် ထွက်လာတာပါ "
" ဒကာ ဒကာမတွေ ဦးဦးဖျားဖျားလှူတာစားပြီး အငြိမ်မနေချင်ဘူး၊ အဲ့ဒီလို ဟိုသွား ဒီသွားလုပ်နေတာ ပါရာဇိကကျတယ်ကိုယ်တော်၊ ဝန်ကြီးကို တိုင်မယ်"
" ဟမ်! "
========================
" ဦးဇင်းတွေ ဘယ်ရောက်ကုန်တာလဲ"
" ဒီမှာ ကျိန်းနေကြတာပါ ဒကာကြီး၊ ဘာလို့လဲ"
" ဟင်း!!! သူများလှူတာစားပြီး အိပ်နေ၊ သေရင် ပြိတ္တာတောင်ဖြစ်မှာမဟုတ်ဘူး၊ မြန်မာနိုင်ငံဆင်းရဲတ အဲ့ဒါကြောင့်၊ ရှုပ်တယ်ကိုယ်တော်! လူထွက်!
" အဲ ---- "
=========================
" အရှင်ဘုရား! အဲ့ဒီနားမှာ ဘာလုပ်နေတာတုန်း"
" ရပ်နေတာလေ"
" တွေ့လား! အဲ့ဒီလို ရပ်နေလို့ သာသနာက မတိုးတက်တာ၊ တစ်ခုခုလုပ်နေပါ့လားဘုရား၊ အလကားမနေပါနဲ့ ကိုယ်တော်ရယ် "
" ဟောဗျာ"
=========================
" ကိုယ်တော်တွေ ဘာလုပ်နေကြတာတုန်း"
" သြော် --- လက်ဘက်ရည်ဘုဉ်းနေကြတာပါ "
" ဘာ! ကိုယ်တော်တို့က သူများလှူတဲ့ ငွေတွေနဲ့ လက်ဘက်ရည်ဆိုင်ထိုင်နေတယ် ဟုတ်လား၊ အဲ့ဒါ ပါရာဇိကကျတယ်ဘုရာ့၊ သာ/ညှိုးနဲ့စွဲရမယ် "
" ဗျာ!!!!! "
=========================
" ဘာလုပ်နေတာလဲ ဦးဇင်း! "
" သင်တန်းသွားမလို့ဗျ၊ အင်္ဂလိပ်စာသင်တန်း"
" ဟာ! အဲ့ဒါ အဓမ္မဝါဒပဲ၊ အရှင်ဘုရား ဒီမှာ လက်မှတ်ထိုး"
" အဲ-----ဟို "
===========================
" ကိုယ်တော်တွေ ဒီမှာ စုစု စုစုနဲ့ ဘာလုပ်နေကြတာလဲ "
" စာဝါသွားတက်မလို့ ကားစောင့်နေကြတာဗျ"
" အဲ့ဒါဆို တစ်ပါးစီး ခွဲစောင့်နေကြလေ၊ ဘယ့်နှယ် အခုဟာက စုစုစုစုနဲ့ လုပ်နေကြတာ၊ ငြိမ်းစုစီနဲ့ စွဲလိုက်လို့ အကုန်အချုပ်ထဲရောက်ကုန်မယ် "
" ဂျာ! ဟုတ် ဟုတ်ကဲ့ဂျ "
==============================
" ဟို! ကိုယ်တော် ပုလင်းကြီးကိုင်ပြီး ဘာတွေ သောက်နေတာလဲ"
" ဗျာ! ဟုတ် ဟွာလေ! အ အချိုရည်ပါ"
" အို---အချိုရည်တွေ ဘာတွေ လာပြောမနေနဲ့၊ အချိုရည်က ဘီယာအရောင်နဲ့ တူနေတယ်၊ အဲ့ဒါ သာသနာညှိုးနွမ်းမှုပဲ၊ ရပ်/ကျေးသံဃာ့နာယကအဖွဲ့ သွားတိုင်မယ် "
" အဲ----"
=========================
" အရှင်ဘုရားတို့! ဘာတွေ ဖတ်နေကြတာတုန်း"
" ဘောလုံးဂျာနယ်"
" မောင်သာချိုစာအုပ်"
" ဦးဇင်းဖတ်နေတာက တွတ်ပီ "
" ဟာ! ဒုက္ခပဲ! ဒီကိုယ်တော်တွေ ဗုဒ္ဓစာပေတွေ မဖတ်ဘဲနဲ့ လောကီစာတွေဖတ်နေကြတာပဲ၊ ဒီလိုကိုယ်တော်တွေများလာရင် မလွယ်ဘူး၊ သာသနာတော်သန့်ရှင်းရေးလုပ်သင့်တယ်၊ အဲ့ဒါ အဓမ္မဝါဒ"
" ဗုဒ္ဓေါ!!!!!! "
=========================
" ဟာ! အရှင်ဘုရားတို့! ဘာတွေ မီးရှို့နေကြတာတုန်း"
" ဟုတ်! သေခိယနဲ့ ဝိနည်းစာအုပ်တွေပါ"
" အဲ---ဟို အရှင်ဘုရားတို့ ဘယ်လို "
" ဘယ်မှမလိုဘူး၊ ဒကာကြီးတို့ထုတ်တဲ့ စည်းကမ်းတွေရှိနေမှတော့ သေခိယတွေ ဝိနည်းတွေ မလိုတော့ဘူးလေ နော့၊ အဲ့ဒါကြောင့် မီးရှို့ပစ်တော့မလို့၊ အင်း----ပြီးတော့ ဒကာကြီး! "
" အရှင်ဘုရား"
" ကျောင်းပေါ်ခဏကြွခဲ့ဦး"
" အဲ---ဘာကိစ္စ ရှိလို့တုန်းဘုရား"
" ဦးဇင်းတို့ ဘုရားရှိခိုးတော့မလို့ပါ"
" တင်ပါ့ အဲ့ဒါကို တပည့်တော်က ဘာလုပ်ပေးရမှာတုန်း"
" ဟွာလေ! ဦးဇင်းတို့ ကျောင်းပေါ်က ဗုဒ္ဓရုပ်ပွားတော်ကို ဖယ်လိုက်ပါပြီ၊ အဲ့ဒီနေရာမှာ ဒကာကြီး လာထိုင်လှည့်"
" ဟမ်! ဘယ်လို အရှင်ဘုရား"
" ဟုတ်တယ်လေဗျာ! ကျုပ်တို့နေတာ ဗုဒ္ဓသာသနာမှာ မဟုတ်တော့ဘူး၊ ဒကာကြီးသာသနာဖြစ်နေပြီဆိုတော့ ဘုရားရှိမခိုးတော့ဘူး၊ ဒကာကြီးပဲ ရှိခိုးအိပ်တော့မယ် "
" ------------- "
=========================
( မှတ်ချက်။ ။ ဒကာကြီး ဟူသည် ဒကာကြီးကို ဆိုလိုသည်မဟုတ်။ ဒကာမကြီးမဟုတ်သူကို ဆိုလိုသည် )
အရှင်ကောသလ္လ(ရေဦး)
၅၊ ၇၊ ၂၀၁၇။